由央視（CMG中央廣播電視總台）主辦嘅首屆「世界機械人登泰山大賽」週一（2026年11月2日）喺山東泰安正式開鑼，主題係「登高望遠 智競泰山」。近90支隊伍喺泰山紅門廣場出發，挑戰全長約3.9公里、高差600米、設約3100級石階嘅盤道，以山上不同地標為終點。
經激烈角逐，北京「靈翌科技隊」以43分41秒奪得足式機械人競速賽冠軍。今次賽事設人形機械人競速、足式機械人競速、足式機械人負重、外骨骼機械人助力等四個正式賽項，另有一項全域機動探路挑戰賽。
最搞笑嘅係預賽期間嘅一幕：負責追蹤監考嘅裁判追唔贏機械人，體力不支，笑言「狗還行人不行了」。總裁判長蘇慶偉亦坦言，「機械人靠電力運作，更換電池就能繼續加速，但人類裁判靠食物補給，體能始終有極限。」
面對呢個「體能問題」，組委會臨時改「一機一裁判」全程跟隨模式為「固定檢查點」模式，沿賽道每隔約50至60米設一名裁判值守，視野受阻嘅轉彎位及高海拔區域更增設人手，機械人靠近時跟隨一小段路程監考。蘇慶偉話新安排能減輕裁判體力消耗，並令職責更明確。
圖片：╬ಠ益ಠ ／CC0／Wikimedia Commons
技術層面，參賽機械人普遍靠激光雷達（LiDAR，透過發射紅外激光掃描地形形成三維點雲圖）「建圖」，行路前先把整條古道跑上一遍，將有無石階、有無陡坡做到心中有數。四足機械狗下盤穩、步態靈活，兩足人形機械人則需額外加裝感測器，部分隊更把「眼睛」喺胸前專守下盤。
足式機械人負重賽，機械狗馱住兩個西瓜（各5公斤）同兩盤雞蛋（各1.5公斤），合共13公斤配重上泰山。
賽例明確：比賽期間參賽隊伍絕不可對機械人施任何人工協助；若機械人喺無人操控下衝出賽道或影響遊客安全，將視嚴重程度處以罰時。
模姐驗嚇貨： 呢場比賽真正有分量嘅地方，唔係邊隊最快，而係機械人點樣處理泰山呢種「真實世界」地形——高低闊窄唔一嘅石階、鵝卵石路、陡坡急彎。呢啲先係山地具身智能（embodied AI）真正落地需要解嘅問題。裁判臨時改制嗰幕，其實係個好現實嘅註腳：當機器真係快過人、強過人，「人監督」嘅模式本身就需重新設計。而負重13公斤上級，亦唔係一個輕鬆嘅演示。
模姐｜深度調教
