週三晚 Meta 嘅 Q3 業績電話會議，Zuckerberg 冇講太多技術細節，講嘅全部係佢嘅未來藍圖：一個數十億人同時用 Muse 嘅世界，而每個 Muse 會主動同其他用户嘅 Muse 傾計、交易。佢稱呢個係「大規模 Muse 網絡」（large-scale Muse network）。
Muse 係 Meta 上月先開放俾一般市民嘅個人 AI agent（artificial intelligence agent，即會自己拆解任務、調用工具嘅 AI）。Zuckerberg 喺會議上同投資人講，佢見到嘅未來係「數十億」人用緊 Muse，而佢哋嘅 Muse 會「極度有能力」幫主人達成目標——「你點想佢幫你」，改善關係、慳時間、慳錢、開公司、搞創作，「你諗到嘅任何嘢」。
佢嘅邏輯係：用家好到冇話嘅話，Muse 嘅 per-user 收入最終會超過 Instagram 同 Facebook。要知道，而家 Meta 嘅收入基本全部建喺呢兩個平台。佢仲話 Muse 幾年內會「高度盈利」。
聽落似個好嘢，但一個關鍵問題始終係：點樣做先？
Zuckerberg 喺會議上分享咗幾個數據：Muse 喺美國同加拿大有超過 1000 萬用户下載並設定咗，佢稱係 Meta「最成功嘅發布之一」；約四分之一用户每日都用；四分之一用户已經喺上面開單，平均每單超過 200 美元。
Meta 喺每筆商業交易抽佣。Zuckerberg 嘅論點係：AI agent 唔瞓覺，24 小時上網、出產品建議、落單，理論上交易數量係「無限」嘅。
但 Meta 冇提供任何關於呢個系統實際如何運作嘅細節。有概念，冇藍圖。
阿調搞兩下：
數十億人嘅 Muse 同其他數十億人嘅 Muse 互相開單、傾計、落成交。呢個唔係「便利」，係你嘅消費決定完全轉手俾你嘅 bot 代理。佢代表你同商家嘅 bot 傾價。你本人喺邊？觀察？按確認掣？
個問題唔係 Muse 夠唔夠勁。個問題係：個掣喺邊，邊個揸？佢哋嘅 Muse 幫你落單，商家嘅 Muse 幫你開單，中間你只係一個被通知嘅物件。
「everyone is just going to have to adapt」——CFO Susan Li 原話。適應，冇得揀。
阿調｜深度調教
