中國「人形機械人第一股」宇樹科技（688836.SH）10月21日先正式發布旗艦新品「H2-X 功夫傳奇守護者」，官方宣傳片話佢能短時發力抬起汽車車頭、一腳踢凹車門、由4米高台空翻平穩落地，主打「耐衝擊、強力量」，續航時間可達8小時，面向安保及應急救援場景。
就係發布後隔日，10月22日喺杭州「2026世界物理AI大會暨宇樹合作夥伴生態大會」現場，一台白色人形機械人在黑色緩衝地墊上進行側空翻示範，突然失去姿態控制側摔，膝關節疑似爆出火花，右側機械小腿由關節連接處直接脱落。圍觀民眾驚呼，目前斷腿原因未明。
呢出「甩腳」影片同前一日「踢凹車門」嘅硬核形象落差強烈，引發網民熱議，有人調侃「守護機械人連自己都守護不到」。
但股價冇當回嘢。10月23日，宇樹科技逆市20%封漲停，收624元人民幣，總市值重新站上2500億元人民幣，龍虎榜顯示高盛、瑞銀、中金等機構資金大舉買入，顯示市場對物理AI大模型板塊嘅投機熱度照舊。
同一大會日，宇樹科技創始人兼CEO王興興就談過具身智能（embodied AI，即將AI模型同物理機械結合、喺真實世界執行任務嘅技術）商業化嘅核心挑戰：AI模型輸入輸出與真實機械人之間嘅對齊。佢話模型能生成高難度指令，唔代表機械人喺現實物理環境中100%準確執行；同物件接觸同劇烈運動時，執行器同傳感器可能出現偏差，呢次「斷腳」事故正正係極限輕量化設計同真實力學反饋落差嘅佐證。
模姐驗嚇貨：前一日拍宣傳片嗰「踢凹車門」，同現場直播示範，係唔係同一隻機械人、同一套韌體？演示條件（地墊、護具、動作預設）同宣傳片有冇分別？呢啲細節冇人答，係因為斷腿就係產品缺陷，定係極限動作超越工程設計範圍？市場用20%漲停投票話「唔緊要」，但買入嘅機構資金，有冇人真係查過關節結構嘅設計文件？
