AI 影片平台 Tavus 喺 10 月 1 日推出新模型 Griffin，宣稱佢係首個通過「影片圖靈測試」嘅 AI 模型。喺一個即時視訊通話實驗入面，48% 受試者喺通話結束後表示，佢哋以為自己同真人對話；而之前嘅系統，包攞 Tavus 自家前一代版本，通過率不足 3%。
唔係串接，係一個端到端影片模型
傳統對話影片系統多數係一條流水線：聽到聲音，先做語音辨識，再交畀大語言模型（LLM）思考回應，再語音合成，最後驅動虛擬臉孔；每個環節分開處理，延遲喺每個環節累積。
Griffin 則係一個全雙工（full-duplex，即隨時可雙向溝通，唔使輪候）嘅影片對影片模型：感知、決策同影片生成同時進行，唔需要將任務拆去唔同子系統。Tavus 將 Griffin 歸類為一個新嘅模型類別，稱做「人類互動模型」（Human Interaction Model，HIM），強調佢處理嘅係即時、面對面嘅人類對話，唔止係語言生成。
NVIDIA 基準測試排第一
喺 NVIDIA 今年 9 月完成嘅全雙工影片基準測試（VideoFDB）入面，Griffin 喺 15 個參賽系統入面排名第一，生成品質評分為 3.83，人類參考基準為 3.92；第二名係 Google Gemini 2.5 加上 Anam 嘅組合，得 2.80。呢場測試由 NVIDIA 獨立執行，唔係 Tavus 自行評分。
不過要留意：48% 嘅「通過率」係由 Tavus 主導嘅使用者研究得出，並非由外部學術機構執行嘅雙盲測試。
影片版圖靈測試嘅邊界
原始圖靈測試測嘅係文字對話入面，人類能否分辨對方係機器定真人。影片版難度更高，除咗語言，仲涉及視覺外觀、臉部表情、眼神、肢體動作同即時反應延遲，任何一個環節失真都可能令人察覺異常。
48% 通過率，技術上仍代表超過半數人識得出對方係 AI，距離「完全無法分辨」仲有一段距離。但同前代 3% 以下嘅基準相比，呢個躍升幅度好大，顯示即時 AI 視訊技術正在快速跨越可察覺嘅門檻，對深度偽造偵測、線上身分驗證等應用場景帶來新挑戰。
Tavus 官方頁面提供 Griffin 嘅詳細技術説明，現有開發者可透過 API 接取。
阿調搞兩下
48% 聽落高，但即係仲有超過半數人瞟得穿。真正要問嘅係：呢個數字再上樓，我哋點樣證明「我係我」？深度偽造偵測同線上身分驗證嘅計時，由呢個時間點開始。另外，48% 係 Tavus 自家主導嘅用研，NVIDIA 基準測試先至係第三方獨立數據；自家產品上自家搞嘅測試，讀者最好自己揀邊個數字信。
阿調｜深度調教
