生產力局轄下嘅香港工業人工智能與機械人研發中心（FLAIR），今日（15日）舉行「具身智能國際應用訓練場」嘅開幕儀式，成為全港首個專注於具身智能（embodied AI，即機械人喺真實環境中感知同學習）及人形機械人實景應用嘅基地。
訓練場聲稱集技術研發、模型訓練、系統驗證同場景測試於一身，提供真實應用環境。首階段匯聚 7 家技術夥伴及 8 家國際場景夥伴，覆蓋工業製造、智慧物流、零售服務、巡檢維護同公共服務。進駐公司喺現場展示了機械人「調酒師」、零售店「店長」同分包裹員等應用示範。
創新科技及工業局局長孫東出席致辭，話人形機械人同具身智能係「新一輪科技創新的關鍵前沿」，期望訓練場「為新型工業化注入新動能」。佢另外透露咗一串政府數字：
- 香港人工智能研發院將於今年投入運作；
- 政府向「人工智能資助計劃」額外注資 10 億元；
- 預期今年內啟動 100 億元嘅「創科產業引導基金」，引導市場資本投向人工智能同機械人板塊；
- 截至今年 4 月底，已透過「創新及科技基金」資助超過 390 個、總額約 11 億元嘅人工智能相關項目。
模姐驗嚇貨：呢個場嘅定位係「測試同訓練場」，唔係已可商用嘅機械人產品。示範同部署之間，仲有安全、成本同可靠性嗰幾關要過。而官方數字（研發院、10 億、100 億）都係政府單方面表述，第三方仲未核實，當宣傳看就夠。
