Google 今個禮拜開咗一個叫 Connected Apps Platform 嘅開發者平台，而家處於預覽（preview）階段。簡單講，佢係一條統一嘅「閘口」，俾第三方開發者透過 MCP（Model Context Protocol，模型上下文協定）將自家服務接到 Gemini 同 Google 搜尋，唔使再同兩邊各搞一次。
MCP 係一層標準化嘅協定，開發者只需透過佢描述自己嘅工具、參數同呼叫方式，Gemini 或搜尋就會根據用户請求自行選用相應工具，向 MCP 伺服器發出指令，再由伺服器執行後回傳結果。重點係 MCP 唔係取代原有 API，第三方服務嘅查詢、訂購等後端操作都仲可以照舊行原有嘅 API。
平台畀咗兩條技術路線。第一條係雲端 MCP 伺服器，開發者要提供公開嘅 HTTPS 連線端點，同一套整合可以一次過覆蓋 Gemini、Google 搜尋或者兩者。第二條係 Android MCP，透過 Android 嘅 AppFunctions API 開放應用原生功能，令 Android 版 Gemini 可以直接喺裝置本機執行操作，適合需要係喺手機本地執行嘅場合；Google 開發文件寫明呢條路線目前只適用於 Android 上嘅 Gemini，同雲端 MCP 有明顯區別。
開發者流程方面，Google 設咗一個 Connected Console，開發者可以喺入面註冊應用、設定 MCP 端點、帳户授權方式、測試人員，並揀選發布對象。涉及用户帳户資料嘅服務可以透過 OAuth 取得授權。應用要通過 Google 嘅審查先可以正式上線；上線後可以查看流量、延遲及錯誤率。而家呢個平台採分階段開放，開發者要申請參與，全面開放時間尚未公佈。
Google 話 Gemini 同搜尋目前合計已推出超過50款 Connected Apps，涵蓋工作效率、活動購票同健康健身等領域。Adobe、Experian、Localiza 同 Peloton 已經喺 Gemini 完成整合，預計未來幾周會擴大到 Google 搜尋。
阿調搞兩下：呢個動作嘅實質，係 Google 將原本「點對點」嘅第三方合作，改成一個統一嘅「閘口」。對開發者嚟講，一次整合覆蓋兩個產品，維護成本降咗；對 Google 嚟講，佢嘅話語權就大咗——審查、授權、授權範圍，全部行 Google 嘅流程。用者嘅資料、帳户同授權範圍嘅實際處理方式，目前冇獨立第三方測試，得等佢真係全面開放先，先見分曉。
