GitHub 而家將 HydraFusion 研究預覽嘅覆蓋範圍擴大咗，原本只喺 Copilot 命令列工具提供，而家 VS Code 同 GitHub Copilot 應用程式都揾到佢。用家喺 Copilot 嘅模型選單揀 HydraFusion 就搞到，但首先要搞清佢係咩：呢個唔係某一個單一模型，而係一套協調多個模型做嘅機制，會視乎任務決定由一個模型直接處理，定係俾多個模型接力完成並檢查結果。
呢個機制會根據各模型喺推理、寫程式碼、除錯同調用工具方面嘅強弱，喺三條路徑入面揀一條。最簡單嘅路徑，直接交俾一個模型搞掂成件事；另一條路係先令效率較高嘅模型出初稿，過咗品質關先收工，唔過就先交俾能力強嘅模型接手；第三條路最「多人」，一個模型出完，再交俾另一系列嘅模型做 review，呢個 reviewer 只係提出意見、唔動手改，最後仍由出初稿嗰班人馬修改一次。
呢個同 Copilot 既有嘅 Auto 功能唔同。Auto 每次請求只係幫你揀一個啱用嘅模型；HydraFusion 則連「點分工」都一齊決定，必要時同一輪處理會動用多個模型。不過操作上對你冇分別，照舊喺選單揀個名，後面點分配係系統自己喺背後搞。
要玩嘅話有幾個前提。VS Code 要 1.140 或以上，或者用 Insiders 版本；如果公司用緊 Copilot Business 或 Enterprise，管理員要先行開放預覽先有得用。至於 GitHub Copilot 應用程式，記得更新到最新，再喺設定入面將 HydraFusion 打開。
今次更新同時改善咗運行時嘅狀態顯示。系統會更頻繁咁更新進度，俾你用家睇到而家走到邊個階段，尤其長任務，你至少知道佢仲係行緊，冇喺度 hang 住。
但要講清楚，GitHub 目前仍將 HydraFusion 列為研究預覽，仲係早期階段，面向 Pro、Pro+、Business 同 Enterprise 用家（後兩者要管理員啟用），後續行為同處理仍可能有調整。
阿調搞兩下：多模型接力加互相 review，邏輯上係想提高結果嘅可靠度。但呢個仲係研究預覽，後期行為仍可能改。呢套分工由系統喺背後決定，你只係喺選單揀個名，睇唔到分配邏輯。最實際嘅問題：當多層模型接力完，出錯嘅係邊個？最終 check code 同執手尾嘅，始終係你。
阿調｜深度調教
