年燒廿萬蚊，YC 老大個 agent 讀晒佢廿年治療筆記
Y Combinator CEO Garry Tan 喺 Walter Isaacson 嘅播客節目 The Builders 新環節（週二推出）放話：佢一年喺 tokens（大模型處理語言嘅計費單位）上花大約 10 萬至 20 萬美金，用嚟喂自己嘅 AI agent。佢話呢個數目係「唔係邊個都負擔得起嘅瘋狂特權」（a crazy privilege that not everyone can do）。
佢早前亦曾笑稱自己患過「cyber psychosis」（網絡精神錯亂），因為太興奮同 AI agent 做嘢，有時成個晚瞓唔到。
條 agent 讀晒佢嘅嘢，連廿年治療筆記都讀
Tan 話佢嘅 agent 幫佢處理數不清嘅工作同編程任務，亦幫佢做播客研究、預習可能被問嘅問題。但佢話最關鍵嘅嘢係：
「佢讀晒我成個 email、成個 Dropbox，仲讀晒我嘅 Apple Notes，連我過去二十年嘅治療筆記都有。」
佢形容呢種用法係「幾乎你日常生活做任何嘢，佢都可以幫你，而且有一定程度嘅自主性。就似時刻有個 Jiminy Cricket 喺你膊頭」，可以主動提醒「呢個點算？」或者幫你睇到轉彎位。
YC 自己亦開咗個「有性格」嘅內部 agent
Tan 話 YC 內部有個叫 Stray Light 嘅 agent，「有性格」，亦有「公司腦」，存晒佢哋投資過嘅所有創辦人、所有曾同佢哋寫 mail 嘅人、所有 application 嘅完整 context。佢稱呢個 agent 正在「重建 YC 嘅運作方式」。
Tan 係 OpenClaw 嘅早期用户，現為重度用户。佢話一個學到嘅教訓係：唔好將 AI agent 當成傳統軟件。佢話好多人因為太擔心「可重複性同安全」，結果丟棄咗同 AI agent 合作時最美好嘅部分——「佢哋基本上可以好似人類咁」。
佢亦喺 Github 免費開放咗 23 個 Claude Code skills，命名 gstack，話想教其他人 agent 可以做嘅嘢。
成本太貴，大科技公司免費 agent 都未必係答案
Tan 相信個人 AI agent 最終會普及，但要先解決一個大問題：成本要降。佢話而家「太貴」。
但佢同時提出，由大科技公司控制嘅免費 agent 未必係答案。講到 Meta 作為社交媒體公司點影響我哋，佢話：「呢個係一間好大嘅公司，控制住算法，我哋都希望佢某程度上唔會控制。」佢話「可以想像一個由你控制、由你編程嘅個人 AI。」
阿調搞兩下：呢個話聽落好激進，但核心問題好實際——你嘅 agent 讀晒你 email、Dropbox、Apple Notes，仲有廿年治療筆記，呢啲嘢擺喺邊個嘅伺服器、用咗邊間公司嘅模型、可以唔可以被收歸？Tan 講「你控制、你編程」，但個掣喺邊？
阿調｜深度調教
