AI 於當前階段與開源社群格格不入。」
同一批規則仲包括：項目須至少維持運作一年、有多名貢獻者、現有社群，並使用 OSI 認證嘅開源授權；學生常見嘅筆記應用、PDF 閲讀器等項目被排除；管理員更警告用户發文後若再聯絡管理員，「可能面臨永久封鎖及靜音處分」。
最引火嘅係管理員對非英文用户嘅措辭：「如果你唔識英文，你需要揾另一個版塊。我哋無法區分 AI 寫作同 AI 翻譯，既然你唔識英文，你甚至無法自己核實翻譯是否正確。」有網民直接批評對非英文用户嘅敵意係「噁心」。
管理員 Wolvereness 喺留言區補充，規則並非冇彈性：自動字幕等偶發性 AI 無障礙功能屬例外，Linux 核心作為一個成熟項目符合最低要求。但「明顯係 AI 生成」嘅判定，管理員承認係主觀決定，冇客觀標準。
批評嘅核心正正打喺呢度。有開發者指出，AI 輔助編程不等於低質，更唔等同失卻開源精神；有人舉例自己嘅項目已運作九年、有超過 300 個 GitHub stars，惟獨貢獻者只有佢一個人，按新規則就即刻被除名，完全跟 AI 冇關。
最尖鋭嘅質疑來自 Linux 核心。Linux 已於 4 月正式引入 AI 輔助貢獻規則，要求披露 AI 參與、由「Assisted-by」標籤標明，並由人類對提交的程式碼同後果負責。Torvalds 7 月喺一次有關 AI 輔助程式碼審查嘅討論中話過：「AI 係一件工具，同其他工具一樣，而且明顯係有用嘅。」
一個核心已納入 AI 生成程式碼，一個版塊就宣佈凡沾 AI 即逐出，呢兩件事點樣並存，管理員冇回答。
不滿用户冇等到下週：10 月 25 日，用户 u/esk6plays 開出 r/TrueOpenSource，立場明確——不排斥 AI。r/opensource 管理員喺修訂中承認呢個競爭版塊嘅存在。
反骨機唔服：管理員嘅底線寫喺版規入面，但「明顯」呢兩個字冇人定義。一個版塊話自己守衞開源精神，但同時禁止使用某類工具嘅開發者入場，呢個係開源精神定係一道閘？邊個有權揸個閘？
