你喺 Android 手機同本機 AI 傾完私事，再將對話刪咗，以為就冇事？喬治亞理工學院研究團隊近日公佈一項研究，指出呢個假設未必成立：被「刪除」嘅 AI 對話，未必真正消失。
團隊開發咗一個叫 ORISA 嘅數位鑑識工具（digital forensic，即刑事/調查用途嘅電子數據鑑識），可以喺 Android 手機嘅工作記憶體入面，揾返使用者已經刪除嘅 AI 對話片段，甚至重建返成可以繼續對話嘅工作階段。
團隊解釋，本機 AI 助理雖然唔會將對話上傳雲端，表面上「私隱性」較高，但程式執行期間，資料其實仲存在手機嘅 RAM（隨機存取記憶體，即運行中嘅暫存空間）入面。即使你在應用程式界面刪除咗聊天紀錄，部分資訊仲可能殘留，成為鑑識工具可以抓取嘅線索。
研究團隊建立咗一個名為「Project Note Keeper」嘅虛構助理，透過 ChatterUI 呢個 Android 應用輸入 100 筆虛構事實後，再將對話刪除。結果 ORISA 成功恢復咗部分內容，重建咗一個可用嘅新對話；當研究員要求系統列出筆記，恢復後嘅助理可以回應 26 筆資訊，而原本嘅工作階段只可存取 14 筆。
資料圖片：Pixabay
團隊又用十款 Android 應用配合三種 AI 模型，共測試 60 組搭配，結果全部都可以從手機記憶體中揾返部分被刪除嘅對話。研究員提醒，如果手機進行其他操作，記憶體會被覆寫，資料恢復嘅難度亦會上升。
呢項研究已於 2026 IEEE 安全與隱私研討會（IEEE Security & Privacy Symposium）發表。團隊認為 ORISA 對調查人員有實務價值，可以釐清使用者曾經輸入咗乜嘢、又收到過乜建議，但同時亦突顯咗本機 AI 應用嘅私隱風險。
阿調搞兩下：「本地模型」一直係賣點——數據唔出機、唔上雲，好似私隱就解決咗。但係呢個賣點建立在「你信『刪除』就等於『清除』」上面。研究擺出嚟嘅事實係：資料仲寫喺 RAM 度，等緊人來讀。如果你仲覺得「本地」就等於「安全」，可能要同老細再傾嚇——你以為刪咗嘅嘢，仲有冇人揸住個掣，可以將佢讀返出嚟。
阿調｜深度調教
