Qt 推出嵌入式裝置介面設計工具 Clate，並開放第一個 Beta 版本 0.6。呢個工具專為工業設備、醫療儀器同消費電子產品嘅 HMI（人機介面，Human-Machine Interface）而設，重點係：設計師唔使寫程式碼，就可以透過視覺化編輯器或者 AI 生成操作畫面，再將成果匯出成 QML 程式碼（Qt 嘅宣告式介面語言），交工程師整合入 Qt 應用程式。目前 Beta 版免費下載。
呢類嵌入式裝置嘅處理器同記憶體都有限，介面要配合特定硬體開發，用普通網站或者手機 App 嘅設計工具出圖，工程師收完設計稿仲要逐個重新寫 code，介面被重複做。Clate 將設計同 Qt 開發環境連埋，切低呢個重複工序。
實際運作上，Clate 以 Qt Quick 為底，設計師喺畫布拖放圖形、文字、圖片，背景會自動對應到 QML 物件。可以調位置、大小、顏色同漸層，亦有獨立視窗預覽。匯出時按頁面建資料夾，各圖層輸出為 QML 檔，工程師載入 Qt 6.12 應用程式後，再加互動邏輯同資料處理功能。
最吸引位：Clate 內置一個聊天 AI 助理，設計師用自然語言指令 AI 新增畫面或者改設計元素。首波經 ACP（Agent Client Protocol，代理客户端協議）連接 Anthropic 嘅 Claude Agent，用家要自己用 Claude 帳號登入。另外 Clate 內建一個本機 MCP 伺服器（MCP，Model Context Protocol），其他支援 MCP 嘅 AI 工具都可以連線讀取及修改目前開啟嘅設計專案。
不過 0.6 仍係測試階段，現版本未有可重用設計元件，亦無資料綁定。Qt 官方 roadmap 係：2026 年加入變數同資料綁定功能，2027 年春加動畫編輯、設計系統管理同多人即時協作，正式商用版預計 2027 年夏推出。
阿調搞兩下：呢個工具嘅切入位唔算新——用 AI 生成 UI 再匯出成程式碼，同好多 UI 生成器思路類似。真正有價值嘅位係佢將「設計 → 工程師接手」嘅重複工序切低，專攻資源有限嘅嵌入式場景，唔係幫網頁/App 團隊加碼。不過佢係 Beta，無可重用元件、無 data binding，即係話做一頁一頁唔使手敲 code，但做完整個裝置仍然要逐頁處理。要判斷佢真係省到工程師幾多工時，要等 2027 年商用版出、有人真用過先講得算。現階段就當功能講解睇。
阿調｜深度調教
