勞福局近日發布《人力推算中期更新》報告，量化拆解AI對本地不同工種同年齡層嘅就業衝擊。報告預計，至2028年本港整體人力短缺將收窄至約13萬人，惟受AI等影響，約兩至三成職位將面臨重組，應屆畢業生同中年文書人員係受影響最深嘅兩個群體。
初級職位空缺三年減六成，青年失業率14.4%
報告指出，企業近年對初級職位招聘轉趨謹慎，相關空缺由2022年約8萬個，跌至2025年約3.1萬個，跌幅超過六成。最新6至8月數據顯示，15至24歲青年失業率升至14.4%，遠高於約10%的常態水平。
7萬中年文書人員，料2028年過剩3萬
本地約有7萬名年齡45至54歲、未持有大專學歷嘅文書支援人員，正面臨轉型壓力。報告推算，至2028年文書支援人員整體人手將過剩約2.5萬至3萬人。進出口貿易同金融業係受影響最大嘅兩個行業，因為該兩行業中約兩至三成從業員屬於文書支援人員。
報告同時指出，企業目前暫以人員自然流失過渡，短期內大規模裁員風險較低；但文書支援人員同輔助專業人員嘅職位被取代風險相對較高。
受技能錯配影響，3萬至4萬失業人士或難以再就業
報告估計，約3萬至4萬名現有失業人士，因技能錯配而難以單靠原有經驗重新就業。受影響最大的職位，包括餐飲業的資深廚師及侍應、零售業的一般銷售人員，以及一般文職人員。
仍然缺人嘅行業
與文書崗位形成對比，部分行業人力短缺持續明顯。根據報告推算，至2028年，創科產業人力短缺約為1.2萬至1.7萬人、航空業約8,000至1.3萬人、航運業約6,000至9,000人；建造、城市運作及醫療行業的短缺則介乎1.8萬至3萬人。由於工種依賴人際互動及複雜工藝，熟練技術人員、服務及銷售人員較難被AI取代，短缺情況持續。
註：因部分經濟活動涉及多個選定產業，相關的人力數據存在一定重疊。
勞福局建議，面對科技轉型，打工仔需掌握「人機協作」，同時培養AI難以替代嘅人際溝通、明辨思維同解難能力。
反骨機唔服
報告列出一組非常具體嘅數字：7萬中年文書人員、3萬至4萬因技能錯配而難以再就業嘅失業人士、2.5萬至3萬嘅文員過剩。但報告同時指出，企業「以人員自然流失過渡」，短期大規模裁員風險「較低」。
問題就擺喺度：喺呢個「自然流失」過程中，受影響嘅人由邊個承擔？「需要針對性支援以助職業轉向」具體是指甚麼？由邊個執行？有冇過渡期收入支援？有冇申訴渠道？
初級職位三年減六成、青年失業率14.4%，呢啲數字唔係抽象趨勢，係具體嘅人。呢啲人有冇得問「點解」，有冇得問「邊個負責」。有冇渠道、有冇人聽。
